D Baumwulla-Spinnerei vu Khur

Am 17. März anno 1861 hät im Gasthof «zum Lukmanier» di erschti GV zur Gründig vur Baumwulla-Spinnerei stattgfunda.

In da Folgejohra isch dia Spinnerei im Meiersboda zu einem vu da bedütendschta bündnerischa Industrieunternehma ufgstiga. Sogar anera grossa Industrie-Usstellig im Johr 1867 sind Produkt vum Meiersboda in dr Metropola Paris zeigt worda. Di guati geografischi Lag für da Bezug & au Absatz vur Baumwulla plus drzua no di konstanti Wasserkraft vu da Flüss Plessur (usem Schanfiggertal) und Rabiusa (usem Churwaldnertal) sind natürlich sehr zuaträglich xi.

Erbaut isch dia Fabrik vum Herr Ingenieur Sim. Bavier worda.

64 Meter lang – 25 Meter breit

4 Stockwerk

4 grossi Sääl

sage und schreibe 21'600 Spindla häts ir Fabrik ka

spöter sinds denn um di 170 Mitarbeiter xi, wo do iras Brot verdiant hend.

Di inneri Maschinerie isch vu da Gebrüader Platt us Oldham, England ko, während d Turbina vu Egli&Huber us Rüti Züri und d Wasserleitigsrohr vu Escher&Wyss us dr Stadt Züri ko sind.

25 Johr lang isch das guat ganga mir Baumwulla-Spinnerei. Denn isch dr «roti Hahn» ko und hät alles zerstört.

28. April 1886 - D Landsprütza isch am Nomitag am 3i usgruggt und hät probiart ds retta was mögli isch. Leider hät si am Füür nid mächtig könna werda und am 6i isch denn d Spinnerei bis ufs Muurwerk ababrennt. D Brandursach, so häts spöter gheissa, isch a «Selbstentzündig vunera Maschina xi».

Drno also im Johr 1889 sinds «Lendi & Parli» xi, wo dia Ruina ufkauft hend – ana Wiederufbau nid ds denka – hends kurzerhand a Mühli baut. Gheissa hät si denn ganz aifach d «Neumühli» und us dera isch in da Johra 1892-1906 dr erschti städtischi Strom glieferet worda.

Hüt erinnerend no ds Kosthuus (no immer bewohnt) und ds Maschinahuus (a Materialdepot) an dia glorricha Wirtschaftsziita mir Spinnerei, wo ds Täli in di wiiti Welt usatrait hend.

Inhält usem Buach vum D.Cantieni usem Johr 1976, Band 3